बाँके, राप्ती सोनारी — बाँके जिल्लाको राप्ती सोनारी गाउँपालिका वडा नम्बर ३ ले वडाभित्र रहेका सुत्केरी र गर्भवती महिलालाई लक्षित गरी पौष्टिक आहार तथा राहत सामग्री वितरण गरेको छ।
सोमबार वडा कार्यालयको प्राङ्गणमा आयोजित कार्यक्रममा वडाध्यक्ष मीन कुमार चौधरीको अगुवाइमा ७५ जना सुत्केरी तथा गर्भवती महिलालाई चामल, तेल, झुल, अण्डा, हर्लिक्स, आइरन चक्की तथा न्यानो कपडासहितको राहत प्रदान गरिएको हो।
कार्यक्रम वडाको आर्थिक सहयोगमा सम्पन्न भएको थियो।
वितरण कार्यक्रममा वडा अध्यक्षसहित जनप्रतिनिधि तथा स्वास्थ्यकर्मीको टोलीले सहभागी भई महिलाहरूको स्वास्थ्य परीक्षण पनि गरेका थिए।
अध्यक्ष चौधरीले मातृ तथा शिशु स्वास्थ्यप्रति वडाको विशेष ध्यान रहेको उल्लेख गर्दै आगामी दिनमा समेत यस्ता कार्यक्रमलाई निरन्तरता दिने प्रतिबद्धता जनाए।
स्वास्थ्य सचेतना अभिवृद्धि र पोषणको प्रवर्द्धनका लागि यस्तो कार्यक्रमले सकारात्मक प्रभाव पार्ने विश्वास स्थानीयले व्यक्त गरेका छन्।
बर्दियाको सुर्खेत–नेपालगन्ज सडकखण्डअन्तर्गत चेपाङमा २२ किलो लागुऔषध (अफिम) सहित दुई जनालाई प्रहरीले नियन्त्रणमा लिएको छ।
चेकजाँच गर्ने क्रममा मोटरसाइकलमा सवार उनीहरुको साथबाट उक्त परिमाणको लागुऔषध फेला परेको प्रहरी नायब उपरीक्षक चक्रबहादुर डमरपालले जनाकारी दिए।
पक्राउ पर्नेमा जाजरकोट, नलगाड नगरपालिकाका ३७ वर्षीय भक्तबहादुर शाही र चितवन, राप्ती नगरपालिकाका २७ वर्षीय कुमार वाइबा छन्।
प्रहरी नायब उपरीक्षक डमरपालका अनुसार शंकास्पद अवस्थामा देखिएपछि खानतलासी गर्दा भित्री झोलामा पोका बनाएर राखिएको अवस्थामा अफिम फेला परेको थियो। शाहीले मोटरसाइकल चलाएका थिए भने वाइबा पछाडि सवार थिए।
अदालतबाट म्याद थपको अनुमति लिएर प्रहरीले सोमबार दुवैलाई सार्वजनिक गरेको छ। अनुसन्धान जारी रहेको डमरपालले बताए।
